Pamilihan Katua RT di Banjarbaru wayah ini sadang rami-raminya. Bubuhan pejabat nang lawas (petahana) disuruh lurah maulah Panitia Pamilihan Katua RT. Karna disuruh pak Lurah maka sebarataan katua RT maulah Panitia.  Utuh Lihum  kada handak tatinggal, inya melamar jadi panitia pamilihan.  Ujar Anang Kurihing nangapa garang ikam Hum mati kahandakan jadi panitia pamilihan, pina pambibisanya. Ai… ujar Utuh Lihum ikam nangai jangan pati harat mamadahakan aku pambibisanya. Akuni sudah pangalaman.  Pilpres yang lalu aku umpat Paman Arul jadi panitia pamilihan, tukang lipat kartas suara wan tukang angkut mambagiakan ke TPS.  Sakalinya kada disangka-sangka ada hunurnya….. lumayan gasan manukar baras. Tabalujur aku kada babaras…. mahadang urang manyarang kada singdatangan.  Ujar Paman Arul…. wahini kadada lagi serangan pajar. Hunur panitia ni gin cukupam sudah…..
ituam ti jadi aku handak pulang umpat panitia pamilihan….. hari sahujan-hujan, kada kawa maujik, padaringan pinda takang…..
uh dintukah…. ujar Anang Kurihing. Ada garang hunurnya…….  Mun kisah acil Utar tu kedada hunurnya…. tapi mudahanai ada… mun rajakinya ada…. ada haja…..

Amin…. ujar utuh Lihum..... dengan roman penuh harapan.