Tumbur politik pemungutan suara ulang sampai ka talinga Anang Kurihing. Inya talambat tahu karena paket data habis, kada kawa maisi imbah hari raya habis-habisan te-ha-er gasan mudik. Di socmed sudah rami banar tapi Anang  Kurihing hanyar haja tahu.

Badadas inya mandapati Utuh Lihum handak batakun nang sabujurannya. Dalam hati Anang  Kurihing ni bilanya ada cucuk mancucuk pasti ada sarang manyararang.  Itupang nang dibungunnya.

Pas bedapat Utuh Lihum langsung Anang Kurihing pada pokok permasalahan tu de puin.

Anang Kurihing  :  Bujurkah ada pilkada ulangan.
Utuh Lihum : bujurai… kaina Hari Sabtu 19 April 2025. Napa garang pina basumangat banar ikam Nang….
Anang Kurihing : ai… nyataai basumangat, kalupang ada te-ha-er jilid kedua.

Utuh Lihum : ikam ni sabaharian, hingganya nangitu nang dibahas.

Anang Kurihing : Dimapa pang lagi, kundisi kauangan ku sedang resesi. Baras balarang, usaha Ojol pina macet, gawian lain kada tapi tantu, banyak pihaka. Ujar Pak Luhut tanang haja dahulu, dollar 17 ribu masih normal. Nyamanai sidin bapandir, kada biasa sakit pang.
Utuh Lihum : Haw…. pina balantih, kanapa menyambati pak Luhut.  dimana ikam mandangar?….  Pak Prabowo sudah memadahi kita….. mun kada kawa manukar lombok jangan katuju makan nang padas….. efisiensi jar sidin….. apalagi si Dunal Tram pina macam-macam.

Anang Kurihing : Imbah pang kaya apa soal Pilkada ulang nih…..

Utuh Lihum : kaina sabtu dihadap ni nah datang ke TPS….. jangan kada datang, ini panting banar.
Anang Kurihing : Insya Allah aku datang.  Ujar urang ti ada kutak kusung, apa maksudnya Tuh…. aku kada tapi paham.

Utuh Lihum : Karena hanya ada satu pasangan calon, maka disediakan kotak kosong, jadi calonnya kada saurangan. Mun biya saurangan kada usah Pilkada.

Anang Kurihing : Lalu kotak mana nang kita cucuk. mun nyata-nyata kusung gasan napa dicucuk.

Utuh Kurihing : tasarah ikam haja. Nang mana kira-kira ikam percayai untuk jadi pamimpin kita sampai 5 tahun nang akan datang.

Anang Kurihing : mun kucucuk kutak kusung dan kutak kusungnya manang berarti kita dipimpin kutak kusung kah?

Utuh Lihum : makanya pikirakan bujur bujur dulu. Bila kotak kosong nang manang maka tapaksa tahun depan kita pilkada lagi.

Anang Kurihing : tapi bulih hajakah kita mamilih kutak kusung, sedangkan urangnya kadada.

Utuh Lihum : mun kada bulih, gasan napa kolom kotak kosong tu diandak disitu.  Masalah itu jua am nang maulah kita ni harus Pemungutan Suara Ulang.

Anang Kurihing : ayu ai mun daintu.

Utuh Lihum : Mun sudah paham, lakasi nginum kupi, sawat dingin kada nyaman lagi. Jangan tapi mamikirakan sarang menyarang. Buhannya sudah kada tapi baliur lagi. Sudah pintar dan anti pulitik uang.

Anang Kurihing : Ayuha…. aku datang ke TPS menyoblos kutak sesuai hati nurani.

Utuh Lihum : jangan hati Nurani, tapi hati ikam saurang.